Ish-ministri i shëndetësisë, Ilir Beqja, duket se e ka humbur durimin me ecejake-t e përjavshme në SPAK për aferën e sterilizimit. Nëse deri tani ka hyrë dhe ka dalë në heshtje nga Prokuroria e Posaçme, sot, në dalje Ilir Beqja duket se ka ndier lodhje ose bindjen se Edi Rama do të avancojë me urdhëra ndaj SPAK për ta burgosur dhe ka vendosur t’i çojë atij një mesazh, se edhe ai, si gjithë të tjerët, di shumë më shumë sesa flet.
Në dalje nga SPAK, Beqja ka ndaluar për të komunikuar me gazetarët dhe ka thënë se SPAK, për aferën e sterilizimit, duhet të hetojë edhe periudhë tre vjeçare gjatë së cilës paisjet e sterilizimit nuk janë vënë në punë.
Në dukje, duket sikur Beqja kërkon që SPAK të hetojë Ogerta Manastirliun, e cila gjatë asaj periudhe ka qenë përgjegjëse direkte për mos vënien në punë të investimit, në cilësinë e drejtoreshës së spitalit, por Beqja e di shumë mirë që Ogerta ka qenë në atë detyrë si njeriu i besuar i Ramës (siç ai vetë) dhe një deklaratë e tillë sot në dalje nga SPAK është më shumë mesazh për Ramën, ‘që unë di më shumë sesa flas’, sesa mesazh për hetimin e Ogertës.
Pyetja e gazetarit: Kur thoni qe duhen të hetohen njerëz të tjerë e keni pasur fjalën për Manastirliun?
Ilir Beqaj: Unë kam kërkuar që hetimet të vlerësojnë pse nuk u vu në punë për 3 vite dhe gjithashtu të vlerësojnë arritjet fantastike në 8 vite që zbatohet kontrata.
Këto deklarata të Ilir Beqajt sot ngjajnë me ato të Arben Ahmetajt në një studio televizive, pak para se të niste sulmi total i Ramës ndaj tij, kur tha se, ‘unë nuk kam asnjë fuqi të kaloj 17 vendime për inceneratorët brenda ditës…’.
Ndjenja e pasigurisë mes rilindësve se po shkojnë si ‘koka turku’ para drejtësisë së komanduar për hir të Ramës po rritet dita-ditës./Syri.net
