Grida Duma ka deklaruar se Edi Rama dhe Sali Berisha po ndjekin të njëjtën trajektore sa i takon reformës zgjedhore, duke synuar në thelb të njëjtin rezultat. Në një intervistë për emisionin “Breaking” në Top News me gazetaren Dafina Hysa, ajo theksoi se të dy liderët po luajnë me formula të ndryshme për të arritur në uljen e numrit të deputetëve.
“Ne duhet të kuptojmë çfarë prodhon qasja e pozitës dhe opozitës. Para zgjedhjeve, Berisha ka propozuar 100 deputetë, pas zgjedhjeve, Rama thotë të shkojmë në 101. Teoria e lojës për të shkuar me shumë mënyra në një rezultat të njëjtë… të dyja palët duan njëjtën gjë uljen e numrit të deputetëve”, u shpreh Duma.
Ajo shtoi se fokusi i Ramës nuk duhet të jetë reduktimi i deputetëve, ndërsa për Berishën problem mbetet mënyra si zgjidhen ata. Sipas saj, këto ndryshime ngushtojnë terrenin politik dhe dëmtojnë subjektet e reja.
Sa i përket rolit të ndërkombëtarëve, Duma tha se ndikimi i tyre është në rënie dhe zgjidhja duhet kërkuar brenda politikës shqiptare.
“OSBE-ODIHR nuk ndryshon gjë në ekzekutiv dhe legjislativ… SHBA e ka vëmendjen te lufta në Iran… ndërkombëtarët janë një faktor minor”, deklaroi ajo.
Për vitin 2029, Duma parashikoi dominim të vazhdueshëm nga PS dhe PD, ndërsa kritikoi mungesën e bashkërendimit në kampin opozitar.
“Nuk kam dyshim që në PD ka njerëz vlera… por ka mungesë dakordësie mes partive të vogla… Dy liderët e forcave kryesore politike e kanë mbyllur lojën vetë”, përfundoi ajo.
