U zhvillua këtë të mërkurë seanca e radhës ndaj Laert Haxhiut, i cili po gjykohet veçmas për një sërë veprash të rënda penale, përfshirë vrasje, atentate, shpërthime me tritol dhe grabitje me armë.
Gjatë seancës, avokatët e tij kërkuan thirrjen e rreth 60 dëshmitarëve, duke theksuar se dëshmitë e tyre janë të domosdoshme për sqarimin e plotë të rrethanave të çështjes. Haxhiu, i cili mbahet në burgun e sigurisë së lartë në Drenovë, nuk ishte i pranishëm fizikisht në sallën e gjyqit.
Në fokus të kërkesës së mbrojtjes ishte edhe episodi i vendosjes së tritolit në dyqanin e reperit Noizy në Durrës, për të cilin u kërkua thirrja si dëshmitarë e Bashkim Rajkut, babait të artistit, si dhe Kleviol Ahmetajt, i njohur si “Cllevio”, i ekstraduar disa muaj më parë nga Dubai.
Nga ana tjetër, prokurori i SPAK, Behar Dibra, kërkoi që procesi i marrjes së provave të nisë me dëshminë e bashkëpunëtorit të drejtësisë Artan Tafani, rrëfimi i të cilit ka rënduar pozitën e grupit të Haxhiut.
Seanca e radhës është caktuar për më 29 prill në orën 08:30, ndërsa mbetet ende e paqartë nëse Haxhiu do të paraqitet në GJKKO për t’u përballur me ish-bashkëpunëtorin e tij.
