Një ngjarje e rëndë ka tronditur sërish familjen Kaso në Bilisht. Teuta Kaso, nëna e 42-vjeçarit Rigels Kaso, i cili u vra rreth një vit më parë, është gjetur e pajetë në banesën e saj.
Sipas të dhënave paraprake nga policia, 66-vjeçarja dyshohet të jetë vetëhelmuar, ndërsa trupi i saj u zbulua në shtëpi nga familjarët. Ngjarja ndodhi në qytetin e Bilishtit dhe është duke u hetuar nga autoritetet për të përcaktuar me saktësi shkakun e vdekjes.
Policia ka referuar materialet në Prokurori për vlerësim, ndërsa priten rezultatet e ekspertizës mjekoligjore për të konfirmuar nëse bëhet fjalë për vetëvrasje apo ndonjë shkak tjetër.
Rigels Kaso ishte plagosur rëndë në një konflikt një vit më parë dhe ndërroi jetë në spitalin e Traumës në Tiranë. Vdekja e tij kishte lënë një plagë të thellë në familje, ndërsa humbja e të ëmës shënon një tjetër kapitull tragjik për familjen Kaso.
