Ditën e sotme në Durrës u regjistruan dy raste të reja me koronavirus.
Bëhet fjalë për dy të moshuar të moshave 71 dhe 77 vjeç.
Për 71-vjeçarin, ka dyshime se është infektuar nga djali dhe nusja, të cilët punonin në një call center.
Djali dhe nusja i janë nënshtruar analizave dhe tashmë pritet përgjigja.
Aktualisht në Durrës janë shënuar 12 persona të prekur nga COVID-19, mes të cilëve 1 viktimë.
Qyteti bregdetar së bashku me Korçën, janë të tretët për numër banorësh të infektuar, pas Tiranës me 124 dhe Fierit me 22.
Ditën e sotme ndërkohë u shënuan 11 raste të reja nga 90 testime të kryera, duke e çuar numrin e përgjithshëm në 223, në mesin e të cilëve 11 viktima dhe 44 të shëruar.
Në spitalin Infektiv ndodhen 76 persona, 6 prej të cilëve në terapi intensive, ku 4 prej tyre janë intubuar.
Autoritetet ndërkohë vijojnë me thirrje për respektimin e rregullave të higjienës, distancimit social dhe kufizimin e daljeve nga shtëpitë.
Që nga dita e sotme, lejohet të dalë vetëm një anëtar i familjes për të blerë ushqime ose ilaçe brenda 24 orëve, pasi ka marrë më parë konfirmimin nga portali e-albania.
