Gjykata e Krimeve të Rënda ka dhënë masën e sigurisë, “Burg pa afat”, për 35-vjeçarin, Arjan Shahaj, raporton Top Channel.
Ky i fundit goditi me sëpatë në kokë babanë e tij 77-vjeçar duke i marrë jetën, teksa kishin dalë për të prerë dru, në fshatin Shalës të Memaliajt.
Dyshohet se i riu vuan nga probleme të shëndetit mendor, por nuk ka kartelë mjekësore.
Për këtë arsye, gjykata ka marrë vendimin që 35-vjeçari t’i nënshtrohet një ekspertimi nga mjekët e psikiatrisë.
Në dëshminë e tij të parë, i riu tha se babai i kërkonte të mos ngacmonte një vajzë, ndërsa ai ia kishte përsëritur, se nuk donte të dëgjonte më këtë muhabet.
Mirëpo në dëshminë e radhës, Shahaj dha një version tjetër.
Ai rrëfeu, se babai e kishte qëlluar me shuplakë, për shkak se kishte refuzuar që të priste dru, ngaqë ishte alergjik.
Më pas i riu kishte marrë sëpatën dhe kishte goditur babanë, por nuk ishte larguar nga vendi i ngjarjes, derisa të sigurohej se i ati kishte ndërruar jetë.
