Vrasja e Ilaria Sulës vijon të jetë në qendër të vëmendjes në Itali, ndërsa autoritetet po punojnë për të zbardhur plotësisht rrethanat e ngjarjes.
Hetuesja e çështjes ka vizituar burgun “Regina Coeli”, ku ndodhet i ndaluari Mark Antony Samson, autori i dyshuar i krimit.
Ai ka ndryshuar sërish dëshminë e tij, duke pretenduar këtë herë se kishte zbuluar Ilarian duke komunikuar me dikë tjetër përmes mesazheve.
“U futa në dhomë dhe gjeta Ilarian duke folur me mesazhe me dikë. I kërkova të më tregonte telefonin dhe ajo po fliste me dikë tjetër. Më pas ajo më ktheu unazën e fejesës dhe aty e humba toruan. Nuk e pranova dot ndarjen dhe e vrava”, i tha Samson hetueses në një bisedë prej pesë orësh.
Më herët, Samson kishte thënë se kishte pasur konflikte me të ndjerën për shkak të notave dhe vendimit të saj për t’i dhënë fund lidhjes.
Sipas “La Repubblica”, prokuroria po heton edhe mbi përfshirjen e të tjerëve në fshehjen e trupit të vajzës shqiptare. Hetimet kanë zbuluar se, përveç nënës së Samsonit, edhe dy shokë të tij kanë ndihmuar në përpjekjet për të fshehur krimin.
Ndërkohë, autoritetet italiane vijojnë me mbledhjen e provave dhe dëshmive që mund të hedhin më shumë dritë mbi motivet dhe dinamikën e vrasjes.
