Dosja e përplasjes së makinës së policisë në Elbasan, ka bërë xhiro nga Prokuroria e Elbasanit, te e Përgjithshmja dhe më pas te Krimet e Rënda.
Gjatë transportit humbën disa DVD, të cilat ishin pjesë e hetimit.
Gjykata e Krimeve të Rënda, bëri me dije ditën e sotme, se kishte arritur të rekuperonte 11 DVD dhe një disk, të cilët nuk ishin në dosje, shkruan “Balkanweb”.
Në njoftimin e gjykatës, thuhet se personi që ka kryer akt-ekspertimin, nuk është kujdesur që të bëjë një kopje të dytë.
Ndërkohë Krimet e Rënda kishin bërë kërkesë në Prokurorinë e Elbasanit, por prokurori Behar Dibra tha se nuk mund ta shpjegonte këtë situatë, për shkak të lëvizjes disa herë të dosjes.
Kujtojmë këtu se më 18 shtator 2017, patrullat e policisë kishin dalë për verifikim, pasi morën një sinjalizim se tre automjete kishin bërë manova, si dhe i kishin drejtuar denoncuesit një pistoletë.
Gjatë kontrolleve, policia kishte pikasur një mjet tip “Range Rover” në zonën e tregut ushqimor, i cili ishte shumë i ngjashëm me përshkrimin e qytetarit.
Në këtë moment blutë i bëjnë shenjë që të ndalojnë.
Njëri prej personave që ishin brenda në mjet, zbret dhe i jep diçka rojes së tregut.
Pasagjer në këtë mjet ka qenë Endri Çopja dhe një person tjetër, të cilët refuzuan të shoqërohen në polici.
Menjëherë në vendngjarje u mblodhën forca të shumta policie.
Vetëm pak minuta më pas, një mjet tip “Audi” tenton të futet në tregun ushqimor dhe përplas makinë e policisë.
