Gazetari italian, Sigfrido Ranucci, drejtuesi i emisionit investigativ “Report” është një ndër emrat më të njohur së fundmi në Shqipëri. Por duket se nuk është vetëm dokumentari që bëri për Shqipërinë arsyeja, pasi ka qenë i njohur edhe më parë. Një histori të rëndë e ka zbuluar me audiencën italiane gjatë një interviste për emisionin “La volta buona” në Raiuno.
Me një motor në dorë, teksa fliste për të atin, tregoi sesi kishte shpëtuar nga vdekja një shqiptar, që ishte paguar për ta vrarë. Ngjarja ka ndodhur katër vjet më parë, kur pranë shtëpisë së tij dëgjoi zhurmën e një aksidenti. Aty ndërhyri për ta ndihmuar pa e ditur se personi në fjalë kishte shkuar për t’i marrë jetën vetë atij.
Ranucci: Kur hyra në portë, dëgjova një zhurmë jashtë dhe dhe dola. Gjeta një person të larë në një pellg gjaku. Ia kam qepur plagën, kishte një arterie femorale të prerë dhe do të kishte vdekur për 15-20 minuta. Kushdo që është motoçiklist, siç ishte babai im, sepse më kishte thënë që ky incident ndodh shpesh tek motoçiklistët, e di që në atë çast ke shumë pak minuta për të ndërhyrë dhe për të ndaluar gjakderdhjen, gjë që u përpoqa ta bëja menjëherë.
Kush ishte ky person?
Ranucci: Ishte një djalë shqiptar, trafikant droge. Vite më vonë e zbulova se e kishin dërguar të më vriste nga një person që ishte ende në burg, prandaj përfundova nën roje. Akoma shoqërohem me eskortë. Ka sakrifica për mua! Duhet të falënderoj shtetin sepse më lejon të vazhdoj lirisht të bëj punën time
Disa muaj më vonë, gazetari zbuloi se kishte mësuar që personi në fjalë quhej Ardian dhe ishte paguar për ta hequr qafe, por edhe pse tani e di këtë informacion, sërish nuk është penduar që i ka shpëtuar jetën. Ndërsa së fundmi në Shqipëri është bërë i njohur për reportazhin e “Rai 3”. Të dielën, Report në “Rai3” arriti të bënte zhurmë në të dy vendet pas një analize për marrëveshjen e emigrantëve. Sipas tyre, garanti i kësaj marrëveshje është Sekretari i Përgjithshëm i Kryeministrisë, Ëngjëll Agaçi.
Agaçi përshkruhet në dokumentar si avokat i disa trafikantëve të drogës në Itali, ndërsa zbulohet edhe një episod i cili pas transmetimit është cilësuar si korruptiv, ai i lidhur me Fabrizio Lisin, ish-shef në Guardia di Finanzia, të cilit trafikanti shqiptar Artur Shehu i dhuroi 30 hektarë tokë buzë detit, përmes ndërmjetësimit të Agaçit. Vetë Agaçi i quan gjetjet e gazetarëve italianë shpifje, ndërsa paralajmëroi padi për programin. Prej këtij dokumentari, Ranucci po zhvillon një debat virtual me kreun e qeverisë shqiptare, Edi Rama, për të cilin thuhet se mund të shkojë të dielën që të përballet me të në Itali.
