Këtë të mërkurë, Gjykata e Posaçme Kundër Korrupsionit dhe Krimit të Organizuar ka zhvilluar shortin elektronik për caktimin e gjyqtarit që do të shqyrtojë dosjen ndaj ish-deputetit socialist Jurgis Çyrbja dhe dy bashkëpunëtorëve të tij, Ahmet Masha dhe Altin Hajri.
Në këtë proces u përcaktua që gjyqtarja Etleva Deda të marrë këtë çështje, e cila i është referuar nga Prokuroria e Posaçme.
Pak ditë më parë, SPAK përfundoi hetimet dhe depozitoi dosjen në GJKKO, duke kërkuar fillimin e gjykimit. Prokurori Adnan Xholi ka ngritur ndaj të pandehurve tre akuza: “Shpërdorim i sekretit shtetëror në mënyrë të përsëritur”, “Përkrahje e autorit të krimit” dhe “Korrupsion pasiv në zgjedhje”.
Gjithashtu, prokuroria ka vendosur të ndajë dosjen në pjesë të ndryshme për të identifikuar funksionarët e tjerë publikë të dyshuar për përfshirje në marrjen dhe shpërndarjen e informacioneve të klasifikuara si sekret shtetëror.
