Në Belgjikë është zhvilluar një seancë gjyqësore për rastin “SKY ECC”, që përfshin 40 të pandehur, shqiptarë dhe kolumbianë, të akuzuar për trafik ndërkombëtar kokaine në kuadër të dosjes së quajtur “Black Eagle”. Gjatë seancës, Prokurori ka kërkuar për dy prej tyre, Alfredo H. dhe Indrit K., dënime deri në 20 vjet burg. Sipas prokurorisë, këta dy janë figurat kryesore të një organizate kriminale që ka menaxhuar trafikun e kokainës.
Prokurori theksoi se gjatë hetimit, i cili filloi në vitin 2020, janë sekuestruar sasi të mëdha kokaine, me vlerë të përgjithshme prej rreth 13.42 milionë euro. Alfredo H. është identifikuar si një nga liderët kryesorë, i cili ka qenë në kontakt me grupe mafioze italiane dhe ka qenë pjesë e një rrjeti më të madh me qendër në Majorka.
Indrit K., një tjetër figurë kyçe në këtë rrjet, u arrestua në Spanjë në janar 2020 me 440 kilogramë kokainë. Roli i tyre në organizatë përfshinte metodat moderne të biznesit, si për shembull bashkëpunimin e ngushtë dhe ndarjen e resurseve, duke përfshirë fuqinë punëtore dhe pajisjet.
Gjithashtu, prokurori zbuloi se në këtë rrjet kishin rol edhe “vëzhguesit”, të cilët monitoronin mbërritjen e anijeve në portet e Antëerpen dhe Gentit dhe “nxjerrësit”, të cilët shkonin me kanoe të fryra deri te kontejnerët për të marrë mallrat e synuara para se të kontrolloheshin nga dogana. “Kimistët” ose “kuzhinierët”, kryesisht me kombësi kolumbiane, ishin përgjegjës për të nxjerrë kokainën nga produktet legale ku ishte fshehur.
Rasti ka zbuluar gjithashtu lidhje të këtij rrjeti me zyrtarë në Shqipëri, dhe priten të zbulohen më shumë detaje në seancat e ardhshme. Disa prej shqiptarëve të përfshirë janë njohur më parë nga mediat si aktorë kryesorë në tregun e kokainës.
