Olsian Çela ka prezantuar para KLP, platformën e tij për postin e Kryeprokurorit.
Ai u shpreh se Prokuroria e Përgjithshme, duhet të ndryshojë strukturë.
Sipas tij, kjo sigurohet nëpërmjet monitorimit të shkeljeve të etikës profesionale dhe sigurimit të aksesit për publikun dhe median.
Kandidati për Kryeprokuror shtoi më tej se prokuroria ka probleme të vjetra, si hetime të dobëta, ndërsa politikat penale kanë qenë të paefektshme dhe kanë sjellë mungesë të besimit te publiku.
Ndër të tjera Çela shtoi, se prokurorët nuk janë të pavarur.
“Vlerësoj zhvillimin e seancës me praninë e mediave dhe kjo tregon se përbën një interes të madh qoftë për mediat ashtu edhe për opinionin publik ndaj do të doja ta parashtroja para jush dhe medias pasi mendoj se është thelbësore, që edhe elementet e opinionit publik të kenë të qartë vizionin e kandidatit të PP-së për 7 vitet e ardhshme. Prokuroria e Përgjitshme duhet të ndryshojë në një strukturë dinamike inovatore, bashkëpunuese dhe ndërvepruese e aftë të prodhojë ide për partnerët vendas dhe të huaj. Hapi i pare është ristrukturimi i pjesshëm i saj dhe të fokusohet në monitorimin e shkeljeve te ndryshme etikes profesionale, sigurimin e aksesit të publikut dhe komunikim permanent me median. Prokuroria ndodhet në një fazë transformimi më të thellë. Ka një mungesë të meritokracisë në promovimin e prokurorëve”, tha Çela.
