Pedagogu dhe politologu Ermal Hasimja ka ngritur një alarm të fortë për gjendjen e opozitës shqiptare, duke e cilësuar mungesën e besueshmërisë si plagën kryesore që e mban larg pushtetit. Gjatë tryezës së organizuar nga Partia Demokratike me pjesëmarrjen e partive opozitare, shoqërisë civile dhe intelektualëve, Hasimja ishte i drejtpërdrejtë dhe kritik, duke theksuar se opozita po dështon aty ku duhet të ishte më e fortë.
“Duhet të jemi të sinqertë. Problemi kryesor i opozitës sot, jo vetëm i PD-së, është besueshmëria. Në çdo vend normal me demokraci, një opozitë mesatare do të mjaftonte për të larguar një regjim të këtij lloji nga pushteti”, u shpreh Hasimja, duke nënvizuar se dështimi nuk vjen nga mungesa e fakteve kundër qeverisë, por nga mungesa e besimit të qytetarëve.
Ai theksoi se opozita nuk ka asnjë luks për përçarje, ego personale apo luftëra të brendshme. Sipas tij, bashkëpunimi mes forcave opozitare nuk është zgjedhje taktike, por domosdoshmëri politike, nëse synohet realisht rotacioni i pushtetit.
Hasimja kritikoi ashpër mënyrën se si PD po sillet ndaj partive të vogla, duke e cilësuar kontradiktore dhe dëmtuese për vetë opozitën. Ai tha se nuk ka asnjë logjikë që PD të ulet me PS për të ndryshuar Kodin Zgjedhor në kurriz të partive të vogla dhe më pas t’i ftojë ato në një front opozitar.
“Janë rreth 150 mijë shqiptarë që përfaqësohen nga këto parti. Ata duhen respektuar, jo vetëm liderët e partive të vogla”, theksoi Hasimja, duke nënvizuar se këto manovra politike dëmtojnë besimin dhe largojnë votuesit.
Ai shtoi se sot institucionet më të besueshme për qytetarët janë ato të drejtësisë, shumë më larg ndikimit partiak sesa vetë partitë politike. Sipas tij, një qëndrim parimor, i qartë dhe i pandryshueshëm nga ana e PD-së do t’i jepte opozitës besueshmëri reale dhe do të hapte rrugën për të tërhequr edhe votues socialistë të zhgënjyer.
Në përfundim, Hasimja theksoi se pa një opozitë të bashkuar, të ndershme dhe të besueshme, rotacioni politik mbetet një iluzion, ndërsa zgjedhjet e lira dhe të ndershme rrezikojnë të mbeten vetëm një slogan.
