Vazhdon ende “lufta” për heqjen e taksës ndaj Serbisë. Pa u mbushur ende 24 orë nga ikja e diplomatit amerikan, David Hale nga Kosova, kryeministri Kosovar, Ramush Haradinaj ka ripërsëritur edhe një herë faktin që Serbia nuk mundet dot të zaptojë tregun kosovar, pa e njohur shtetin.
Haradinaj nga Suhareka ka folur edhe për aktualitetin politik dhe disa nga çështjet më të rëndësishme që kanë prekur Kosovën dhe një theks të veçantë i ka vendosur sigurisht edhe dialogut me Serbinë. Rreth kësaj çështjeje, Haradinaj ka thënë se Kosova nuk do të jep asgjë në këmbim të njohjes së pavarësisë nga Beogradi.
Ai ka treguar se si ndërkombëtarët i kanë thënë se çfarë do të jep Kosova në këmbim të njohjes nga Serbia, dhe për të një gjë e tillë është shumë e rëndë, pasi Kosova nuk ka se çfarë të jep më.
Sipas kryeministrit, njohja e pavarësisë së Kosovës nga Serbia nuk mund të vijë duke i hapur kufijtë, e duke bërë eksperimente me ta.
“Njohja nuk mundet me ardhë, t’u na marrë diçka. Kur po flasin miqtë tanë, se çka jepni ju për njohje, a besoni si me të ra diçka e madhe në kryer. Çka mundemi na me dhanë mo, për të drejtën tonë, për me jetu në tokën tonë. Ne kemi dhënë shumëçka, prandaj kemi mbet vend i vogël. Nuk mundemi na me dhanë. Na mundemi me u pajtu me ecë përpara, por jo me harru. Njohja duhet me ardhë si kërkim falje, por jo tu dhanë tokë, e tu bo eksperimente me veten, tu i hap kufijtë. Çka bojmë pa kaq Kosovë, ku i rrisim fëmijët, që nesër mundemi me u rritë edhe më shumë”, ka thënë Haradinaj.
