Kryeministri Edi Rama publikoi pak më parë në Facebook listën e plotë të bizneseve që do të lejohen të hapen pas 27 prillit, ku përfshihen shitjet me pakicë të mallrave në dyqane të specializuara, taksitë, shitja me pakicë e tekstileve dhe këpucëve, tregtia me pakicë e mobileve, pajisjeve të ndriçimit, artikujve shtëpiake, dyqanet e luleve, bimëve, kafshëve shtëpia dhe suhqimit të tyre në dyqane të specializuara, dyqanet e orëve dhe bizhuterive, pajisjeve audio dhe video, aktiviteti i publikimit të muzikës, tregtia e qilimave, sixhadeve, veshjeve të mureve lodrave,shitjet me pakicë e sistemeve të sigurisë etj.
Rama shkruan se të gjitha këto biznese që do të hapen në fazën e dytë duhet që të plotësojnë protokollin e sigurisë dhe masave kundër COVID-19 në aktivitetin e tyre, në të kundërt do të mbyllen.
“Ja aktivitetet që do të lejohen të hapen nga e hëna 27 prill. Të gjitha bizneset duhet të marrin vërtetimin për hapje aktiviteti në e-albania dhe të njihen me protokollin e sigurisë përmes www.e-albania.al. Vërtetimi dhe protokolli duhet të disponohen në mjediset e biznesit përkatës. Nga hapja e këtyre bizneseve kthehen në punë 27.589 punonjës dhe pavarësisht fillimit të punës përfituesit nga paketa e parë apo paketa e zgjeruar, nuk do ta humbasin mbështetjen financiare prej 3×26.000 apo 1×40.000 lekësh. Shërbimi taksi do të ketë protokoll të veçantë”, shkruan Rama.
Më herët gjatë deklaratës për mediat, Rama tha se do të qëndrojnë gati për t’u rikthyer në fazën fillestare nëse epidemia do të arrije në nivele të padëshirueshme.
Po ashtu, kreu i qeverisë bëri me dije se amnistia fiskale këtë javë do të kalojë në Parlament.
