Ministrja e Arsimit dhe Sportit, Ogerta Manastirliu, njoftoi këtë të hënë se këtë vit, për herë të parë, do të hapet programi i ri i gjuhës së shenjave shqipe në Universitetin e Tiranës. Ky program synon që gjuha e tyre të njihet dhe të mësohet në nivel akademik duke reduktuat barrierat për studentët me aftësi ndryshe me qëllim përfshirjen dhe pjesëmarrjen e tyre në jetën akademike dhe studentore.
“Në Vitin e Gjuhës Shqipe, duam t’i kushtojmë një vëmendje të veçantë gjuhës së shenjave shqipe. Për herë të parë, këtë vit hapëm programin e gjuhës së shenjave shqipe në Universitetin e Tiranës, dhe jemi të përkushtuar për të bërë edhe më shumë në mbështetje të gjithëpërfshirjes së këtij komuniteti.”, tha Manastirliu.
Po çfarë po ndodh në universitetet e rretheve?
Hapja e programit të ri të studimit në Universitetin e Tiranës, vjen në një moment kur degët e tjera të studimit, sidomos në rrethe, po vuajnë mungesën e studentëve. Sipas deklaratave të vetë rektorëve të universiteteve të Korçës dhe Vlorës, kuotat për këtë vit akademik për degët mësuesi, fizikë apo kimi, nuk e kalojnë numrin 5. Edhe pse MASR ndërtoi një strategji, atë të futjes së bursave të studimit si dhe uljen e mesatares, në mënyrë që të thithte student që do ndiqnin këto degë, ajo rezultoi një dështim total duke parë numrin e aplikimeve.
