Ministrja e Infrastrukturës dhe Energjisë, Belinda Balluku ka bërë me dije se është hapur gara për aeroportin ndërkombëtar të Sarandës. Në një dalje publike Balluku tha se aeroporti do të jetë investim privat dhe do të kushtojë 37 milionë euro. Ministrja bëri me dije se shteti nuk e ofron një garanci financiare dhe nuk ka përfshirje direkte.
“Pas kontratës së re të firmosur nga qeveria dhe koncensionari i aeroportit të Tiranës, pas hapjes së aeroportit të Kukësit që ka arritur normalitetin duke kryer fluturime përditë. Pas firmosjes së kontratës për aeroportin e Vlorës tani është radha për lançimin e garës për aeroportin e Sarandës. Ministria e Financës ka marrë përsipër kostot për procedurën e koncensionit. Është një procedurë e lehtë pasi shteti nuk ka përfshirje direkte. Shteti nuk ofron një garanci financiare. Do të jetë investim privat që do të kushtojë 37 milionë”, tha Balluku.
Më tej Balluku ka thënë se për 3-4 vite pritet që të elaborohen 1 milionë pasagjerë. Ajo bëri me dije se gara do të jetë e hapur nga data 2 gusht deri në 23 shtator në faqen e ministrisë.
“Investitori do të ketë mbështetjen totale të shtetit dhe ministrive por procesi i shpronësimeve do të bëhet nga shteti bashkë me Agjensinë e Shpronsimeve”, ka thënë Balluku.
