Ditwn e sotme që prej shfaqjes së rasteve të gripit të shpendëve prej disa javësh, AKU reagon dhe bën me dije se ka vijuar me kontrolle të vazhdueshme të produkteve në tregjet shqiptare.
Autoriteti Kombëtar i Ushqimit ka marrë të gjitha masat, si në terren ashtu edhe në Pikat e Inspektimit Kufitar, në bazë të Planit të Kontigjencës, të miratuar nga Ministri, për monitorim dhe kontroll të situatës në përmbushje të sigurisë ushqimore dhe garantimin e shëndetit të konsumatorit.
Drejtoresha e Përgjithshme e AKU-së, Jeta Deda, në terren me inspektorët, ka përcjellë mesazhe sigurie për konsumatorin shqiptar.
“Prej 5 javësh monitorohet në mënyrë të vazhdueshme dhe raportohet lidhur me gjetjet nëpër tregje, dyqane mishi për gjurmueshmërinë, dokumentacionin e rregullt, certifikatat veterinare”. Jeta Deda tha se janë instensifikuar kontrollet që me shfaqjen e par të rastit të gripit të shpendëve në Shqipëri. Me marrjen e informacionit nga AKVMB, AKU është në terren për të monitoruar masat e marra nga shërbimi veterinar duke garantuar konsumatorin për produktet e nxjerra në treg dhe sigurinë ushqimore.
AKU siguron konsumatorët se ushqimet me origjinë shpendore në treg janë brenda standardeve të gjurmueshmërisë dhe janë të verifikuara nga inspektorët, të cilët janë në terren.
AKU ka ftuar konsumatorët të drejtohen në pikat e certifikuara të shitjes së mishit.
