Deputeti i Partisë Demokratike, Gazment Bardhi, ka folur ditën e sotme në lidhje me aksionin e fundit të qeverisë për konfiskimin e kateve pa leje dhe shitjen e tyre më pas ndaj ofertuesve. Bardhi ka hedhur akuza ndaj Kryeministrit Edi Rama pasi shprehet se ky i fundit e ka vendosur qeverinë në dispozicion të kompanisë së ndërtimit Kastrati, pasi për të favorizuar oligarkët e tij Rama po ndryshon ligjin për t’i legalizuar ndërtimet pa leje.
Bardhi solli në vëmendje numrin e personave familiarë të cilët janë sot të dënuar për ndërtime pa leje. Ai deklaroi se gjatë 5 viteve të fundit3304 shqiptarë janë dënuar me burg për ndërtim pa leje, edhe pse nuk kanë bërë si ndërtim as gradacela dhe as biznes, por se shteti nuk shikon katet pa leje në mes të Tiranës.
Sipas Bardhit drejtori i Përgjithshëm i Policisë së Shtetit dhe institucioni në varësi të tij, IKMT, në kushtet e shpërdorimit të detyrës, kanë refuzuar jo vetëm të marrin masa për të zbatuar ligjin në rastin konkret, por kanë refuzuar edhe të dërgojnë informacionin zyrtar të kërkuar.
Bardhi thekson se Bashkia e Tiranës ishte njoftuar zyrtarisht prej tij për katet shtesë pa leje, detyrohet të mos miratojë leje ndërtimi për kate shtesë, të cilat në fakt ishin ndërtuar.
Por, shtoi ai, 10 ditë pasi Bashkia e Tiranës detyrohet të mos e miratojë lejen e ndërtimit për shtimin e disa kateve, Edi Rama vendos Qeverinë në dispozicion të kompanisë ndërtuese “Kastrati” shpk, duke ndryshuar pikërisht nenin 17 të VKM, që pengonte Bashkinë e Tiranës në ligjërimin e 5 kateve që ishin ndërtuar pa leje, duke hequr kriterin që shtesa nuk mund të jetë më shumë se 2 %. Është VKM nr. 457/29 Qershor 2022.
