Një grabitje e kthyer në tragjedi ka tronditur zonën e Foria di Centola në Itali, ku një 25-vjeçar shqiptar humbi jetën pas një shkëmbimi zjarri me pronarin e një banese ku ai dhe dy persona të tjerë kishin hyrë për të vjedhur.
Sipas autoriteteve italiane, trupi i pajetë i të riut u gjet mëngjesin e sotëm në zonën e Limazzo, në San Severino di Centola, pas më shumë se 48 orësh kërkimesh intensive me dronë dhe qen nuhatës. Ai ishte raportuar i zhdukur që pas natës së grabitjes, kur ndodhi edhe përplasja me armë.
Bashkë me pronarin e banesës, nën hetim ndodhet edhe një nga bashkëpunëtorët e viktimës, i cili aktualisht është i shtruar në spitalin “Cardarelli” në Napoli, i plagosur nga plumbi. Ndërkohë, personi i tretë i përfshirë në grabitje është ende në kërkim.
Pranë vendit ku u gjet trupi i 25-vjeçarit, janë mbledhur familjarë dhe të afërm të tij, të cilët në mes lotësh dhe revoltës kanë bërë thirrje për zbardhjen e plotë të ngjarjes dhe “drejtësi për djalin”.
Policia është në gadishmëri për të garantuar rendin, ndërsa autoritetet kanë urdhëruar autopsinë për të përcaktuar saktësisht shkakun e vdekjes dhe trajektoren e plumbit fatal.
