Hasan Kanaci ka qenë njëri nga të arrestuarit për grabitjen e Rinasit.
Kanaci ka qenë me post shef i kargos dhe u arrestua, pasi policia sekuestroi në banesën e tij 100 mijë euro.
Dyshimet mbi të ranë pasi kishte ndryshuar radhën e ngarkesave për në barkun e avionit Tiranë-Vienë.
Mirëpo, Gjykata kundër Krimit të Organizuar dhe Korrupsionit ka vendosur ta liroj nga qelia, pasi lekët e gjetura në banesën e tij, nuk rezultojnë të jetë prerje me numër serie të njëjtë me ato që janë vjedhur nga bankat e nivelit të dytë.
Po ashtu, nuk është gjendur asnjë provë që e implikon me grupin e grabitësve.
Sot në orën 12 u zhvillua seanca, ku gjyqtari Bib Ndreca ndryshoi masën nga “arrest me burg”, në “detyrim paraqitje”.
Grabitja ndodhi më 9 prill në pistën e avionëve të aeroportit “Nënë Tereza” në Rinas.
Pesë persona u futën në pistë me një furgon me mbishkrimin “Hetimi Tatimor” dhe realizuan grabitjen e 4.6 milionë eurove.
Pak metra larg aeroportit, në Tapizë, u vra Admir Murataj, organizator i grabitjes, i kërkuar për një sërë grabitjesh të tjera.
Falë dëshmisë së të penduarit Alkond Bengasi, një pjesë e mirë e grabitësve janë arrestuar por sërish ka bashkëpunëtorë që nuk janë vënë në pranga.
