Një 29-vjeçar nga Shkodra është ekstraduar nga Kroacia.
Ai ishte shpallur në kërkim ndërkombëtar për veprat penale “Dhënie ndihme për kalim të paligjshëm të kufirit” dhe “Vjedhje me dhunë”.
Ndaj tij, Gjykata e Shkodrës kishte vendosur masën e sigurisë “Arrest me burg” në nëntor të vitit 2018-ës.
Policia konstatoi në shtator të 2018-ës 6 pakistanezë të cilën synonin të kalonin drejt Malit të Zi, me ndihmën e shtetasit P.P.
Ky i fundit i kishte marrë pakistanezëve nëpërmjet kanosjes 720 euro, 2 telefona celularë dhe një çantë me dokumente.
Njoftimi i policisë
Interpol Tirana
Vijon bashkëpunimi me homologët, me qëllim kapjen e personave të shpallur në kërkim ndërkombëtar dhe dërgimin e tyre para drejtësisë.
Një tjetër i kërkuar bie në pranga, falë bashkëpunimit të Interpolit me homologët.
Nga specialistët e Interpol Tirana është bërë ekstradimi nga Kroacia drejt Shqipërisë, i shtetasit shqiptar P. P., 29 vjeç, banues në Shkodër.
Shtetasi P. P. ishte shpallur person në kërkim ndërkombëtar, për kryerjen e veprave penale “Dhënie ndihmë për kalim të paligjshëm të kufirit” dhe “Vjedhja me dhunë”.
Gjykata e Rrethit Gjyqësor Shkodër, në nëntor të vitit 2018, ka vendosur masën e sigurisë “Arrest në burg”.
Përmbledhje e ngjarjes së ndodhur:
Ky person u jepte ndihmë shtetasve të huaj për të kaluar në mënyrë të paligjshme nga Shqipëria në Malin e Zi, duke pasur si destinacion vendet e Evropës Perëndimore.
Shërbimet e Policisë Kufitare Shkodër, në shtator të vitit 2018, kanë konstatuar 6 shtetas pakistanezë, të cilët synonin të kalonin në Malin e Zi, të ndihmuar nga shtetasi P. P., i cili pasi i kishte afruar në kufi me Malin e Zi u kishte marrë nëpërmjet kanosjes 720 euro, 2 telefona celularë, si dhe 6 çanta ku mbanin dokumentet e tyre.
Si rezultat i shkëmbimit të informacionit në kohë me Interpol Tirana dhe Policinë kroate u bë e mundur kapja e këtij shtetasi me qëllim ekstradimin drejt vendit tonë.
