Policia e Durrësit ka finalizuar një operacion për goditjen e një grupi kriminal që shfrytëzonte për prostitucion vajza dhe gra nga Kina.
Pas një hetimi katërjavor, janë arrestuar shtetasi kinez Guangtai Lin, ndërsa dy organizatorët, Guangcheng Lin dhe Yanxia Zhang, janë shpallur në kërkim.
Hetimet kanë zbuluar se treshja rekrutonin shtetaset kineze, në bashkëpunim me individë të paidentifikuar në Vietnam, dhe i dërgonin në Shqipëri për të ushtruar prostitucion.
Policia ka proceduar gjithashtu 7 shtetase kineze që ishin të përfshira në këtë aktivitet.
“Specialistët e Sektorit për Hetimin e Trafiqeve të Paligjshme të Drejtorinë Vendore të Policisë Durrës, pas një hetimi njëmujor me metoda proaktive, në bashkëpunim me Prokurorinë e Durrësit, për veprat penale “Shfrytëzimi i prostitucionit” dhe “Prostitucioni”, finalizoi operacionin policor të koduar “Storm”, i cili u zhvillua në lagjen nr.13, Plazh, Durrës. Në kuadër të këtij operacioni u bë arrestimi në flagrancë i shtetasit G. L., 50 vjeç, lindur në Kinë, i dyshuar për kryerjen e veprës penale “Shfrytëzimi i prostitucionit”. Nisi procedimi penal për 7 shtetase nga Kina, për veprën penale “Prostitucioni”. U shpallën në kërkim shtetasi kinez G. L., 47 vjeç, njëri prej organizatorëve të grupit, dhe shtetasja kineze Y. Zh., 45 vjeçe, menaxhere e grupit, për veprën penale “Trafikimi i qenieve njerëzore’”, thuhet në njoftim.
Hetimet kanë zbuluar se grupi kriminal i drejtuar nga Guangtai Lin menaxhonte dhe kontrollonte financiarisht aktivitetin e prostitucionit nga shtetaset kineze në Shqipëri. Lin transferonte shumat e fituara tek Yanxia Zhang, e cila jeton në Bahrein dhe bëntë ndarjen e parave të përfituara.
Ajo merrte 25% të fitimit, 35% i shkonin grupit që operonte në Vietnam, dhe 40% shkonin për vajzat e rekrutuara, si pagë. Gjatë operacionit, janë sekuestruar shuma parash të përfituara nga ky aktivitet, 13 celularë, 1 laptop, një fletore me shënime mbi vlerat monetare dhe sende të tjera si prova materiale.
