Gjykata e Dibrës ka caktuar masën e sigurisë “arrest me burg” për 31-vjeçarin Hazbi Velsula, i dyshuar si autor i vrasjes së kushëririt të tij, Selim Velsula, në një ngjarje të ndodhur më 11 qershor në fshatin Xibër të Klosit.
Vendimi u mor në një seancë me dyer të mbyllura këtë të enjte, ku i riu ka zgjedhur të mos japë asnjë deklaratë për ngjarjen.
Sipas burimeve nga grupi hetimor, i dyshuari ka kërkuar vetëm praninë e avokatit mbrojtës dhe nuk ka pranuar të shpjegojë motivet e mundshme të krimit, duke qëndruar i heshtur para trupit gjykues.
65-vjeçari Selim Velsula u gjet i pajetë pak metra larg banesës së tij nga një bashkëfshatar. Trupi i tij kishte plagë të shkaktuara nga një mjet prerës. Hazbi Velsula u arrestua disa orë më vonë në zonën e Alliasit në Tiranë, ku ishte fshehur pas ngjarjes.
Hetimet vazhdojnë, ndërsa një nga pistat kryesore që po shqyrtohet nga autoritetet lidhet me konflikte të mëparshme për çështje pronësie, por ende nuk ka një version zyrtar të konfirmuar nga organet e drejtësisë.
