Një ditë pasi Gjykata e Apelit i ktheu ish-kryeministrit Sali Berisha vulën e Partisë Demokratike (PD), erdhi një reagim nga Lulzim Basha. Në një deklaratë për mediat pak para hyrjes së tij në sallën e Kuvendit, Basha u shpreh se nuk është i shqetësuar për fatin e tij personal, por për qytetarët shqiptarë.
“Nuk kam asnjë shqetësim që lidhet me fatin tim personal. Bëj betejë për qytetarët shqiptarë. Pasojat i vuajnë qytetarët shqiptarë. Kur vjen puna për reformën zgjedhore, nuk e kërkoj për veten time por për qytetarët. Qytetarët meritojnë votën preferenciale. Minat ja vunë vetë,” tha Basha.
Ai shtoi se tashmë, anëtarët e PD-së janë të çliruar nga ankthi i vulës dhe logos dhe duhet të çojnë përpara kauzën e tyre. “Distancimin me Ramën duhet ta bëjnë ata që bëjnë pazar me të dhe kjo ishte e qartë nga vendimi i djeshëm i gjykatës,” përfundoi Basha.
Kjo deklaratë vjen në një moment kritik për PD-në, pas vendimit të gjykatës që riktheu vulën te Sali Berisha, duke krijuar një tjetër valë diskutimesh brenda partisë dhe politikës shqiptare në përgjithësi.
