Kryetari i Gjykatës së Posaçme, Sandër Simoni ju bën thirrje gjyqtarëve të mos kenë frikë të dënojnë korrupsionin. Këtë apel e bëri në ftesën drejtuar gjyqtarëve që të aplikojnë për vendet bosh dhe për t’u bërë pjesë e Gjykatës së Posaçme.
Në një prononcim për Report TV, ai u shpreh se “Gjyqtarët shqiptarë refuzojnë të përballen me krimin dhe korrupsionin duke u bërë pjesë e Gjykatës së Posaçme. Vetëm një javë më parë është mbyllur afati i aplikimit për pesë vende vakante në këtë gjykatë, por askush s‘ka kandiduar.
Duke iu drejtuar gjyqtarëve kreu i Gjykatës së Posaçme, Sandër Simoni thotë se togat e zeza duhet të kenë kurajën të përballet me padrejtësitë. E sipas tij, ajo që step më shumë gjyqtarët të aplikojnë është kontrolli i komunikimeve, jo vetëm për ta, por edhe me familjarët e tyre.
Gjykata e Posaçme Kundër Krimit dhe Korrupsionit si pjesë e reformës në drejtësi së bashku me SPAK janë krijuar për të goditur bosët e krimit dhe zyrtarët e korruptuar, por nga 16 gjyqtarë aktualisht në këtë gjykatë mungojnë 7 dhe kanë mbetur 9 vende pa plotësuar.
Simoni mbyll ftesën e tij për të gjithë gjyqtarët dhe publikun, se kjo gjykatë do të ketë kurajën të dënojë zyrtarët e korruptuar.
Në këtë gjykatë pagat variojnë nga 150 mijë deri në 300 mijë lekë, ndërsa ofrohet siguri për gjyqtarët dhe familjarët e tyre nëpërmjet trupave speciale të Policisë së Shtetit.
