Kërkesa e grupit të ish-kryetarit të Partisë Demokratike Lulzim Basha drejtuar Gjykatës së Lartë për pezullimin e vulës është rrëzuar ditën e sotme. Kërkesa është shqyrtuar sot në Dhomën e Këshillimit. Sipas këtij vendimi të Gjykatës së Lartë, Berisha do të ketë të drejtë që të vijojë të përdorë vulën e partisë, pasi kërkesa për pezullim u rrëzua.
Ndërkohë, Gjykata e Lartë do të vijojë shqyrtimin e rekursit të Bashës, i cili kërkon zhbërjen e vendimit të Zhukrit të 23 marsit 2022 që i dha vulën Berishës, prishjen e vendimit të Apelit që la në fuqi Shkallën e Parë, si edhe pushimin e gjykimit.
Rekursin e tij për prishjen e vendimit, Basha e bazon në disa argumente, ku më kryesorja është se sipas tyre Komisioni i Rithemelimit nuk ka pasur asnjë tagër përfaqësimi në këtë çështje dhe se kemi të bëjmë vetëm me një palë, Partinë Demokratike që përfaqësohej nga Enkelejd Alibeaj. Ky i fundit tashmë i larguar edhe nga grupi Basha.
