Gjykata e Lartë ka caktuar datën 3 prill për shqyrtimin e kërkesës së Mario Përlleshajt mbi kundërshtimin e masës së sigurisë “arrest në burg”.
Kjo vjen vetëm disa ditë pasi Gjykata e Tiranës vendosi që çështja ndaj tij të kalojë për gjykim, ku ai akuzohet për vrasjen e bashkëmoshatarit të tij, Martin Cani, më 18 nëntor 2024 pranë shkollës “Fan Noli”.
Trupi gjykues, i përbërë nga Ilir Panda, Albana Boksi dhe Medi Bici, do të vendosë nëse do të pranojë kërkesën e mbrojtjes apo do të lërë në fuqi vendimin e shkallëve më të ulëta të gjyqësorit për masën e sigurisë.
Avokatët e Përlleshajt argumentojnë në rekursin e tyre se nuk ka dyshime të arsyeshme për fajësinë e tij dhe kundërshtojnë ekspertizën mbi rrethanat e ngjarjes.
Ata kërkojnë gjithashtu që të merret parasysh mosha e tij e mitur, duke theksuar rëndësinë e vijimit të proceseve edukative dhe të zhvillimit të tij normal. Për këtë, ata i referohen nenit 86 të Kodit të Drejtësisë Penale për të Mitur, i cili lidhet me vlerësimin e rrezikshmërisë.
Ngjarja ka pasur si pasojë edhe plagosjen e vetë të miturit të dyshuar si autor, si dhe të Luis Meçajt. Që prej nëntorit 2024, 14-vjeçari Mario Përlleshaj mbahet në institucionin e të miturve në Kavajë.
