Gjykata e Lartë ka refuzuar kërkesën e Ilir Metës, kreut të Partisë Lëvizja Socialiste për Integrim (PL), për të ndryshuar masën e sigurisë nga “arrest me burg” në një masë më të butë.
Meta u arrestua më 21 tetor të vitit 2024 dhe kërkoi të lirohet, duke theksuar si një nga argumentet pengesën që po i shkaktohej për kandidimin në zgjedhjet parlamentare të 11 majit.
Ish-presidenti akuzohet nga SPAK për korrupsion, pastrim parash dhe fshehje pasurie, në lidhje me disa çështje, përfshirë dosjet CEZ-DIA, lobimin e ish-LSI në SHBA dhe shpenzimet e familjes së tij.
Aktualisht, Meta qëndron i izoluar në paraburgimin “Jordan Misja” (i njohur ndryshe si 313), ku mbahet prej afro katër muajsh.
