Gjykata e Lartë ka rrëzuar vendimin e Apelit dhe ka lënë në fuqi masën e sigurisë “arrest në shtëpi” për Kreshnik Farrukun (i njohur edhe si Budlla), i cili pritet të ekstradohet drejt Italisë, ku akuzohet për trafik ndërkombëtar droge dhe pjesëmarrje në organizatë kriminale.
Vendimi u mor nga trupa gjykuese e përbërë nga Ilir Panda, Sokol Binaj dhe Sandër Simoni, të cilët rikthyen në fuqi vendimin e mëparshëm të Gjykatës së Durrësit.
Kjo gjykatë kishte vendosur “arrest shtëpie” për 51-vjeçarin, i arrestuar në janar të këtij viti në Manzë të Durrësit, me urdhër të SPAK dhe në bashkëpunim me Prokurorinë e Firenzes.
Farruku akuzohet nga autoritetet italiane për trafik të sasive të mëdha kokaine nga Amerika Latine në drejtim të porteve italiane, veçanërisht në Livorno.
Ai konsiderohet si një nga drejtuesit e grupit kriminal të njohur si klanit “Farruku”. Sipas vendimit të Gjykatës së Breshias të datës 29 gusht 2024, ndaj tij është dhënë masa “arrest në burg”, por procedurat në Shqipëri vijojnë me masën e butë të arrestit shtëpiak.
Në një proces të mëparshëm në GJKKO, Farruku kishte arritur të shmangte përgjegjësinë për komunikimet e kapura përmes aplikacionit të enkriptuar Sky ECC, duke pretenduar dhe provuar se ato ishin përdorur nga vëllai i tij dhe jo nga ai vetë.
