Me identifikimin e rasteve të para me koronavirus në Shqipëri, qeveria vendosi mbylljen e shkollave për dy javë deri më 23 mars, e me shtimin e rasteve afati u shty deri më 3 prill.
Por, duke marrë shkas nga zhvillimet në vend Ministria e Shëndetësisë ka vendosur më 1 prill mbylljen e të gjithë institucioneve publike dhe private deri në një kohë të pacaktuar.
Në këto kushte, teksa qeveria po ndërmerr lehtësime të shumta, nxënës e studentë të shumtë janë të shqetësuar se çfarë do ndodhë me shkollat, teksa deri tani është përdorur si zgjidhje mësimi online.
Ministrja e Arsimit Besa Shahini ka deklaruar herë pas here se viti shkollor nuk do pezullohet dhe se strukturat arsimore kanë dy opsione për mbylljen e këtij viti akademik, ku njëri opsion është përllogaritja e notave për pjesën para përhapjes së pandemisë në vendin tonë ndërsa opsioni tjetër është përmbledhja e vlerësimeve të mëparshme.
LEXO: Koronavirusi, Besa Shahini zbulon 2 opsionet për përfundimin e vitit shkollor
Ndërsa, sa u përket universiteteve ministrja ka deklaruar se ata janë të pavarur nga Ministria e Arsimit, por ka bërë me dije se është në komunikim të vazhdueshëm me dekanët e rektorët dhe se nuk do ketë shtyrje më shumë se në korrik.
Mirëpo, dje është raportuar se gjatë muajve të verës studentët mund të jenë në auditore për të mbyllur vitin akademik 2019-2020.
Në një intervistë me Tv Klan, zv/ministri i Arsimit Oltian Rrumbullaku u shpreh se për shkak të pandemisë një nga opsionet është zgjatja e vitit akademik deri në shtator, për tu rikthyer sërish në tetor për vitin e ri akademik.
LEXO: Covid-19: Viti akademik mund të rifillojë së shpejti e të zgjasë deri në shtator
Mirëpo, së fundmi raportohet se Fakulteti i Gjuhëve të Huaja ka vendosur që të mbyllë semestrin e dytë online dhe sipas informacioneve bëhet me dije se të gjitha proveimet e sezonit të dytë dhe mbrotja e diplomave do të bëhet online, shkruan dosja.al.
Ky fakultet është i pari që ka marrë një vendim, duke bërë me dije se viti shkollor do të mbyllet sipas programit të miratuara që në nisje të vitit akademik.
Tashmë pritetet që Departamentet të nxjerrin datat e provimeve sipas rregulloreve në fuqi dhe studentët kanë të drejtë të marrin pjesë në provim vetëm në një nga datat e caktuara nga departamenti.
Ndërsa, studentëve që nuk do të munden të marrin pjesë në provim në asnjë nga datat e këtij sezoni, do t`u jepet mundësia në një sezon në shtator 2020.
