Mbi 90 persona janë paraqitur ditët e fundit me shen ja helmimi, të vjella dhe diarre në spitalin e Bulqizës për të marrë mjekim. Mbi 50 banorë në Qytetin e Ri të Bulqizës dyshohet se janë helmuar nga përdorimit të ujit të ndotur. Ndotja e ujit dyshohet të ketë ardhur nga përzjerja e ujërave të zeza me ujin e pijshëm.

Vlen të theksohet se kjo ngjarje e rëndë vjen në një momet ku bashkia ka kontraktuar një kompani për të krye punime në sistemin e kanalizimeve dhe trajtimin e ujërave të ndotura.

Një detaj mjaft interesant është se kompania e kontraktuar për ta kryer këtë shërbim është “Gjoka”, e cila prej dekadash nuk po mbaron dot rrugën e Arbrit.

Firma është shpallur fituese e tenderit për “Sistem Kanalizimesh dhe Impiant Trajtimi të Ujrave të Ndotura në Qytetin Bulqizë Lagjja e Re” në 16 nëntor të vitit 2022, kundrejt një oferte 2.4 milion euro me tvsh.

Kontrata është nënshkruar në dhjetor 2022 dhe sipas afateve, punimet duhet të kishin përfunduar brenda 6 muajve dhe duhet të ishin dorëzuar në korrik të vitit të shkuar.

Mbikëqyrëse e punimeve rezultojnë dy kompanitë Daam dhe Net Group, të cilat janë sekuestruar nga Prokuroria e Posaçme, ndërsa pronari i tyre është arrestuar.

Kutojmë se ish-kryebashkiaku Lefter Alla është dënuar me burg nga GJKKO për shpërdorim të detyrës me një tender për stabilizimin e kanaleve të ujërave të zeza në Qytetin e Vjetër, me vlerë 2.8 milionë euro.