Gjykata e Posaçme Kundër Korrupsionit dhe Krimit të Organizuar ka marrë për gjykim dosjen e Ardian Çapjas, Klajdi Dokolou, Etjen Canit dhe Ervis Bardhi. Aata janë të akuzuar për vrasjen e Nezir e Gentian Beqirit (babë e bir), në vitin 2012 në Elbasan.
Dosja është ndarë nga dy të pandehurit e tjerë, Florenc Çapja dhe Olsi Leku. Kjo është bërë për arsyen se dy të fundit janë në mungesë, pasi janë ndaluar, respektivisht në Emiratet e Bashkuara Arabe dhe në Greqi.
Ardjan Çapja u arrestua në mars të këtij viti, ndërsa nip ii tij, Florenc Çapja u arrestua në maj në Dubai. Ai ishte shpallur në kërkim nga autoritetet shqiptare prej disa kohësh.
Florenc dhe Ardian Çapja akuzohen si organizatorë dhe porositës të vrasjes së Nezir dhe Gentian Beqirit, babë e bir, në vitin 2012 në Elbasan. Ngjarja ndodhi në 15 gusht në shtëpinë e Gentian Beqirit. Ky i fundit ishte në “arrest shtëpie”, pasi akuzohej si i përfshirë në vrasjen e Sokol Çapjas (vëllai i Ardian Çapjas). Autorët përdorën Etjen Canin për të hyrë brenda banesës, pasi ai ishte shok fëmijërie me viktimën.
Për vrasjen e Gentian dhe Nezir Beqirit janë arrestuar deri tani Olsi Leka, vetë Etjen Cani dhe Ervis Bardhi, i cili ka treguar ngjarjen si bashkëpunëtor i drejtësisë dhe ka rrëfyer se vrasja ishte porositur nga Florenc dhe Ardian Çapja, i cili është gjithashtu i arrestuar.
