Gjykata e Posaçme e Shkallës së Parë për Korrupsionin dhe Krimin e Organizuar ka lënë në burg Klajdi Merkajn, anëtar i grupit kriminal të drejtuar nga vëllezërit Çopja, pasi kërkoi zëvendësimin e masës së sigurisë.
Merkaj, 35 vjeç, është një mik i ngushtë i vëllezërve Çopja dhe, sipas hetimeve të deritanishme të SPAK-ut, dyshohet se ai ka pastruar paratë për Hajdar dhe Franc Çopjan.
Në nëntor të vitit 2024, ai u ekstradua nga Italia në Shqipëri, pasi Gjykata e Posaçme e Shkallës së Parë kishte caktuar masën e sigurisë “arrest në burg” për akuzën e pastrimit të produkteve të veprës penale ose veprimtarisë kriminale, veprim që dyshohet të jetë kryer në bashkëpunim.
Njoftimi:
1. Kërkuesi Klajdi Merkaj me datë 10.01.2025 ka paraqitur pranë Gjykatës kërkesën me objekt: “Zëvendësimi i masës së sigurimit”, baza ligjore neni 260 e në vijim të K.Pr.Penale.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Bib Ndreca, bazuar në nenet228, 229, 230 dhe 238 të K.Pr.Penale, me vendimin Nr. 46, datë 03.03.2025 vendosi:
1. Rrëzimin e kërkesës së kërkuesit Klajdi Merkaj, vazhdimin e masës së sigurimit “arrest në burg” parashikuar nga neni 238 i K.Pr.Penale, dhënë sipas vendimit nr. 86, datë 29.07.2024 të Gjykatës së Posaçme të Shkallës së Parë për Korrupsionin dhe Krimin e Organizuar.
2. Shpenzimet gjyqësore i ngarkohen kërkuesit.
3. Kundër këtij vendimi mund të bëhet ankim brenda 5 ditëve, nga e nesërmja e komunikimit të vendimit në Gjykatën e Posaçme të Apelit Kundër Korrupsionit dhe Krimit të Organizuar.
