Ish prokurori i përgjithshëm, Adriatik Llalla dënohet me dy vite burg. Gjykata e Apelit të Posaçëm ka lënë në fuqi vendimin e shkallës së parë të GJKKO-së.
Në këtë vendim përfshihet 5 vite heqje të së drejtës për të ushtruar funksione publike si dhe konfiskim të pasurisë. Edhe këtë herë Llalla nuk ka qenë i pranishëm në seancë, ndërsa avokati i tij Sokol Hazizaj ka thënë se nuk ishte në dijeni të vendndodhjes së ish-kryeprokurorit. Kujtojmë se herën e kaluar ai nuk u paraqit në gjykatë me pretendimin se ishte sëmurë dhe po kurohej. Ditën e sotme mësohet se ai prej një jave është larguar jashtë vendit dhe po kurohet në një klinikë private. Nëse nuk paraqitet pas lënies në fuqi të vendimit, ndaj ish kryeprokurorit mund të shpallet mandat arresti e urdhër kërkimi ndërkombëtar.
Llalla u akuzua për disa veprat penale që përfshijnë “Refuzim për deklarim, mos deklarim, fshehje ose deklarim i pasurive, interesave privat të personave të zgjedhur dhe nëpunësve publik ose i çdo personi tjetër që ka detyrim ligjor për deklarim”. Adriatik Llalla u hetua edhe për pastrimin e parave, por në finale ai u dërgua për gjykim vetëm për fshehje të pasurisë. Llallës i janë sekuestruar edhe 4 sipërfaqe toke që në total shkojnë në mbi 22 mijë metër katror si dhe një apartament në qytetin e Durrësit. Sipas GJKKO, ish-kryeprokurori i Përgjithshëm Adriatik Llalla nuk ka pasur burime të ligjshme të pasurive.
Kujtojmë se ai dhe familja e tij janë shpallur “non grata” nga SHBA.
