Shqipëria po përjeton një bum turistik nga fqinjët italianë, duke u kthyer në një nga destinacionet më të preferuara për pushime me buxhet të ulët në vitin 2025. Me çmime të përballueshme, natyrë të mrekullueshme dhe mikpritje autentike, Toka e Shqiponjave është zbulimi i ri i verës, shkruan Andrea Casamassima për të përditshmen italiane alanews.it.
Nga 15 euro fluturimi dhe akomodim ekonomik: Shqipëria është zgjidhja perfekte për një arratisje verore
Fluturimet direkte nga qytete si Roma, Milano, Bari, Venecia apo Bolonja për në Tiranë kushtojnë nga 15 deri në 30 euro nëse rezervohen me kohë. Aeroporti “Nënë Tereza” ndodhet vetëm 30 minuta nga qendra e kryeqytetit, e lehtësisht e arritshme me autobus ose taksi.
Tirana është pikënisja ideale për të eksploruar Shqipërinë, një qytet që ofron akomodime për çdo buxhet. Me bujtina, apartamente Airbnb dhe hotele të vegjël, mund të flini në qendër për rreth 20 euro nata për person, shpesh me mëngjes të përfshirë.
Vizitorët italianë zakonisht ndalojnë në kryeqytet për të shijuar atraksione si Sheshi Skënderbej, Bunk’Art 2 dhe lagjen e gjallë të Bllokut, dikur zonë e ndaluar gjatë regjimit komunist.
Nga Tirana në bregdetin jugor: bukuri natyrore që rivalizon Sardenjën
Aventurat e vërteta nisin kur udhëtimi vazhdon drejt Rivierës Shqiptare. Brenda tre orësh me makinë ose autobus, mbërrin në brigjet e jugut, ku deti i kristaltë, plazhet e paprekura dhe çmimet e arsyeshme e bëjnë këtë zonë një perlë të fshehur të Mesdheut.
Ksamili është një nga pikat më të frekuentuara, me ishuj të vegjël që mund të arrihen me not apo me varkë. Çmimi për një ombrellë dhe dy shezlongë varion nga 5 deri në 8 euro në ditë. Destinacione si Dhërmiu, Himara apo Gjipeja ofrojnë peizazhe të mrekullueshme, guralecë të bardhë dhe ujë të pastër që krahasohet me ato të Sardenjës.
Akomodimi në jug është gjithashtu ekonomik: 25-30 euro nata në dhoma të pastra dhe shpesh me pamje nga deti. Për grupe turistësh apo çifte, ndarja e kostove e bën udhëtimin edhe më të përballueshëm.
Sa kushton një udhëtim 2-3 ditor në Shqipëri për një italian?
Për ata që kërkojnë një arratisje të shkurtër por mbresëlënëse, ja një përllogaritje orientuese e shpenzimeve për 2-3 ditë:
• Fluturimi vajtje-ardhje Itali–Tiranë: 30–40 euro
• Akomodimi (2 netë): 40–50 euro
• Transporti për në jug: 5–10 euro
• Ushqimi ditor (ushqim tradicional + kafe + mëngjes): 10–15 euro
• Totali i përllogaritur: 90–100 euro për person
Ndërsa për ata që zgjedhin të qëndrojnë më gjatë, për më pak se 300 euro mund të kalosh një javë të tërë duke vizituar qytetet, bregdetin dhe atraksionet natyrore të vendit.
Shqipëria, vetëm dy orë larg, por një botë ndryshe
Përtej kostos së ulët, Shqipëria ofron një përvojë të pazëvendësueshme. Njerëzit janë të ngrohtë e mikpritës, ushqimi është i bollshëm dhe autentik, ndërsa plazhet, ndryshe nga ato të mbipopulluara të vendeve të tjera, ruajnë ende natyrën e tyre të paprekur.
Italianët nuk shkojnë vetëm për një herë, shumë prej tyre kthehen sërish, duke e konsideruar Shqipërinë si një kombinim perfekt mes aventurës, relaksit dhe ekonomisë.
