Gjendje alarmante në shkolla, PD publikon mesazhet: Mungojnë termometra e dezinfektues kundër Covid!

Ish-deputetja e Partisë Demokratike në vend, Albana Vokshi ka shprehur shqetësimin e ardhur në adresë të saj për rritjen e infektimeve dhe gjendjen nëpër shkolla.

Me anë të një postimi në rrejtin social, Facebook, Vokshi theksoi se kjo rritje vjen si pasojë e mos marrjes së masave  nga instancat shtetërore.  Ajo renditi disa problematika, duke nisur nga mungesa e kryerjes së tamponeve për mësuesit, termometrat dhe dezinfektantët të cilët janë në mungesë të theksuar në këto ambiente.

“Është dështim kolosal i Edi Ramës që, një vit pas pandemisë. Mësuesve nuk u bëhet tamponi apo testi serologjik. Në shkolla nuk ka maska, alkool, dezinfektant, termometra.”, shkruan Vokshi

Postimi i plotë:

Këtë javë, kam marrë me dhjetëra mesazhe nga mësues të shqetësuar për rritjen e infektimeve në shkolla.

Është dështim kolosal i Edi Ramës që, një vit pas pandemisë, qeveria nuk ka dhënë asnjë qindarkë shtesë dhe nuk marrë masat më minimale të sigurisë në shkolla apo për mësimin online.

Mësuesve nuk u bëhet tamponi apo testi serologjik.

Në shkolla nuk ka maska, alkool, dezinfektant, termometra.

Nuk ka një platformë funksionale për mësimin online;

Shkollat nuk kanë internet. Mësues nga Tirana na tregojnë se detyrohen të punojnë nga lokalet përreth shkollave me mjetet e tyre.

Shumë nxënës nuk kanë pajisje për të mësuar online, ndërsa ata që jetojnë në zona periferike apo rurale nuk kanë as energji elektrike.

Cinizmi i kësaj qeverie me mësuesit nuk ka fund. Mes kësaj gjendje të mjerueshme, Ministria e Arsimit ka nxjerrë grupe monitorimi për mësimin, përfshi atë online. Nga njëra anë, nuk u paguan mësuesve as orët shtesë, nuk u siguron kushtet minimale, nuk u bën as trajnim për të ashtuquajturën platformë dixhitale, nga ana tjetër, përmes kontrolleve të tilla abuzive qeveria shton presionin psikologjik ndaj mësuesve.

Kjo është qeveria më e keqe që ka patur Shqipëria. Për vete trefishoi pasuritë, ndërsa nxënësit dhe mësuesit i la në mëshirën e pandemisë.

Shpresa e mësuesve, e nxënësve dhe e prindërve të tyre është tek PD. Pas 25 prillit, me rritjen e pagave, me shkollat në standardet europiane, ne do të bëjmë ndryshimin që të gjithë duan!