Në një zbulim të jashtëzakonshëm arkeologjik në Strugë, është gjetur një helmetë e lashtë, e cila mendohet të jetë e fisit ilir të Enkelejtëve dhe daton mbi 2,500 vite më parë. Helmetat e këtij lloji, të njohura si “Helmetat Korinthase”, ishin përdorur në Ilirinë e Jugut, veçanërisht nga figura e njohur historike, mbreti Pirro i Epirit.
Ky zbulim, së bashku me objekte të tjera të rëndësishme si qeramika, bronzi dhe ari të gjetura në varrin mbretëror, ka bërë jehonë në mbarë rajonin për vlerën e tij historike dhe kulturore.
Arkeologu Fitni Dalipi konfirmoi se artefaktet i përkasin fisit ilir të Enkelejtëve, që kanë banuar në zonën përreth liqenit të Ohrit dhe kanë krijuar dinastinë e parë të mbretërisë ilire. Dalipi përshkroi varrin si të pasur me artefakte të epokës së bronzit dhe hekurit, të cilat dëshmojnë se popullata që jetonte në këtë zonë kishte një zhvillim ekonomik të avancuar dhe mundësi për të importuar objekte nga vende të tjera.
Ministri i Kulturës, Zoran Lutkov, e cilësoi këtë zbulim si më të madhin në Maqedoninë e Veriut gjatë 100 viteve të fundit, dhe falënderoi pronarët e tokës për bashkëpunimin dhe ndihmën në zbulimin e këtyre objekteve të rëndësishme. Artefaktet do të vendosen në Muzeun Arkeologjik të Shkupit për ruajtje dhe ekspozim.
Përveç helmetës dhe objekteve të zbuluara në Strugë, një statujë antike e gjatë 1.5 metra, por pa kokë, u gjet gjithashtu në fshatin Raveni, pranë Gostivarit. Arkeologu Luan Përzhita e përshkroi këtë statujë si një zbulim të rëndësishëm për arkeologjinë e rajonit.
Ndërkohë, etimologu Lulzim Osmanaj komentoi se helmeta Korinthase është një pjesë e trashëgimisë së lashtë pellazge dhe ilire dhe theksoi rëndësinë e saj si një simbol i fuqishëm i historisë shqiptare dhe ballkanike.
