Gazetari Artan Hoxha ka treguar se trafiku i lëndëve narkotike në vend është edhe arsyeja pse çmimet e apartamenteve janë rritur në mënyrë stratosferike. Në një intervistë në ABC Neës, Hoxha ka thënë se nuk ka kuptim që çmimi i apartamenteve të jetë aq i lartë, duke mbajtur parasysh edhe nivelin e pagave në Shqipëri.
Hoxha tregoi se burimi kryesor për të ardhurat e apartamenteve është prodhimi dhe trafikimi i kanabisit në vend.
“Ne kemi dy tregje të trafikut të narkotikëve në Shqipëri, është tregu i jashtëm dhe i brendshëm. I jashtmi merret kryesisht me kokainë dhe ka grupe të fuqishme shqiptarësh që sjellin kokainë nga Amerika Latine dhe gjetkë. Tregu i brendshëm na shfaqet me problematika si rritja e kriminalitetit këtu”, ka treguar Hoxha.
Ndër të tjera, Hoxha ka treguar edhe për një lloj të fortë droge që ka hyrë në Shqipëri, e quajtur “Gorilla”. Ai ka thënë se ka parë parcela të drogës në fjalë, nga jugu në veri këtë verë.
“Kam parë parcela nga jugu në veri këtë verë. Gorrillën e kam konstatuar në pak vende pasi është farë e shtrenjtë dhe nuk mund ta blejë çdokush. Kjo farë prodhon më pak, por ka prezencë më të madhe të THC-së dhe prandaj çmimi i shkon rreth 4 mijë euro/ kg”, ka thënë Hoxha.
Gazetari tregoi ndër të tjera se kjo bimë rritet shumë shpejt dhe ka krijuar problematika te policia, pasi është bërë më i vështirë monitorimi. Hoxha ka thënë se tashmë është ndryshuar edhe mënyra e kontrollit, pasi një prodhim i tillë e nxjerr jashtë loje strategjinë aktuale të skanimit.
Nga ana tjetër, edhe kultivuesit kanë ndryshuar strategji, pasi nuk i ruajnë më parcelat me roje, por me kamera inteligjente të cilat i sinjalizojnë në celular për çdo lëvizje pranë arës.
“Në fillim në donim të ngrinim dronin për të verifikuar parcelat. Pamë që droni nuk po ngrihej dhe kuptuam që kishte bllokues valësh për të.
Pastaj gjatë lëvizjeve pranë arës pash që kishte sistem inteligjent kamerash, të cilat kishin nxjerrë jashtë loje rojet.
Me roje do harxhoheshin 80-100 mijë euro, kurse me këtë sistem kamerash jo më shumë se 3 mijë euro. Plus që rojet flasin, kurse kamerat jo”, ka thënë Hoxha.
