Denar Biba edhe pse me një historik “jo të pastër” dhe shkelje të vazhdueshme u vendos në krye të Autoritetit të Konkurrencës duke sjellë edhe reagimin e gazetarit Adriatik Doçi i cili thotë se është një tjetër akt antimoral dhe sfidë ndaj interesit publik, pas emërimit të Ilir Beqjas në krye të Donacioneve të Huaja.
Doçi nëpërmjet një postimi në rrjetet sociale, ka theksuar se disa javë më parë Denar Biba, si anëtar i Autoritetit të Konkurrencës, tradhtoi interesin publik, duke votuar kundër gjobitjes së 7 oligarkëve të miellit, të cilët në bazë të një hetimi disamujor të vetë Autoritetit, kishin arritur një pazar me njëri-tjetrin për fiksimin e çmimit të miellit, duke deformuar tregun dhe konkurrencën e lirë.
Gjithashtu gazetari Doçi vuri në dukje edhe skandalin me gjyqtarin shqiptar në Strasburg, Ledio Bianku.
Postimi i gazetarit Doçi
“Vota e Bibës ishte vendimtare që oligarkia e miellit të mos ndëshkohej, për vjedhjen e konsumatorit.
Po të shtojmë edhe faktin se Denar Biba ishte protagonist i një shantazhi ndaj gjyqtarit shqiptar në Strasburg Ledio Bianku dhe se bashkëshortja e tij ia mbathi nga drejtësia për të evituar skanimin e pasurisë nga Vetingu, Biba duhej shkarkuar edhe si anëtar i Autoritetit të Konkurrencës.
PS-ja dhe sferat jashtë saj kanë shumë figura me integritet për një pozicion të tillë kaq të rëndësishëm.
Çuditërisht, ngjitja e Denar Bibës në krye të Autoritetit të Konkurrencës nuk po kundërshtohet nga askush, përveç Erion Braçes, i cili sot është e vetmja opozitë e vërtetë në vend.”
Gazetari Adriatik Doçi e ka bërë dhe njëherë të qartë se promovimi i Denar Bibës jep shembullin se sa më shumë njolla të kesh dhe sa më shumë i zhytur të jesh, aq më lart ngjitesh.
Por skandalet e Denar Bibës nuk kanë të mbaruar, përveç fakteve të përmendura nga Doçi, Denar Biba ka edhe histori të tjera përforcuese të faktit pse ai nuk duhet të jetë në këtë pozicion.
Në vitin 2018, u publikua një audiopërgjim, ku dëgjohej ish kreu i KQZ Denar Biba që shantazhonte gjyqtarin shqiptar të Strasburgut, Ledio Bianku për të ndikuar mbi proceset gjyqësore që kishte qeveria shqiptare për pronat në Strasburg. Edhe pse shantazhi u pranua nga Denar Biba, skandali kaloi pa asnjë ndëshkim.
Kujtojmë, se më 30 dhjetor 2019, gruaja e Denar Bibës, ish-Këshilltare Ligjore në Gjykatën e Lartë, dha dorëheqjen 1 javë para datës së “Veting”, nga frika e pasurive të paligjshme dhe cënimit të integritietit gjatë ushtrimit të detyrës.
Por nuk vonoi shumë dhe më 14 shkurt 2020, ose 40 ditë pas shkarkimit nga KPK dhe përjashtimit për 15 vite nga sistemi i drejtësisë, kryeministri Edi Rama e emëroi Anëtare të Këshillit Drejtues të Entit Rregullator të Ujit në Ministrinë “Balluku”.
Në momentin që po diskutohej kandidatura e Denar Bibës, për Kreun e Autoritetit të Konkurrencës në mbledhjen e Komisionit të Ekonomisë dhe Financave, Braçe u shpreh se ka rezerva për figurën e personit në fjalë.
“Kam rezerva për integritetin e zotërisë, kur të jem ballë për ballë, po e lë me kaq. Kam rezerva. Ai nuk është se ka qenë ndonjëherë pjesë e strukturave të PS. Puna e bërë deri tani në Autoritetin e Konkurrencës, vlerësimi është tërësisht negativ. Dhe i jam referuar qëndrimeve publike të marra në atë institucion. Po ua them që për mua vlerësimi është negativ, nuk është kuptuar fare roli i atij institucioni. Është aty për të mbrojtur interesi publik, madje edhe kur shtypet një apo dy kompani në treg, nga fuqia korruptive, klienteliste e kompanive të tjera, ajo që shqyrtohet është interesi publik, liria e tregut. Kjo është natyra e atij institucioni,” tha Braçe.
Ndërkohë që shumica po bëjnë “një sy qorr dhe një vesh shurdh” për e mërimin e Denar Bibës në krye të Autoritetit të Konkurrencës, Braçe në këtë rast po bën rolin e opozitës.
Ndërkohë të tjerë që janë shprehur kundër emërimit të Denar Bibës si drejtues i Autoritetit të Konkurrencës janë Alfred Rushaj, Edmond Spaho dhe Arbi Agalliu.
“Nuk gjykojmë se zotëria do të ketë besimin të një pjese të mirë që ai është personi i duhur për ta udhëhequr këtë institucion. Është i akuzuar nga një anëtar i gjykatës së Strasburgut për ndërhyrje në një çështje në GJEDNJ”, pohoi Alfred Rushaj.
Ndërkohë Edmond Spaho u shpreh: “Ka institucione që ne i quajmë të pavarura ndërkohë që janë thellësisht politike, dhe ky është rasti tipik i emërimit të një njeriu politik”.
