Zv. ministrja e arsimit, Bora Muzhaqi ka folur për nismën “gati për Shqipërinë”, duke thënë se nuk nevojitet partia apo arkat e peshkut që të rinjtë të punësohen në vendin tonë.
“Distanca fizike nuk është aspak problem për të punuar së bashku. Të gjithë ekspertët janë ftuar dhe janë të mirëpritur të na bashkohen për të ngjitur Shqipërinë në majë. Reagimi që ne patëm nga shqiptarë të zotë anembanë botës na imponoi ta kthejmë këtë nismë në program zyrtar.
Unë jam një shqiptare e kthyer nga jashtë për kontribuar në vendin tim dhe sot jam e privilegjuar të kontribuoj në këtë projekt për t’i hapur dyert të rinjve të tjerë. Kolegët e AKSH-it kanë bërë një punë unike për të krijuar një platformë. Gati për Shqipërinë.al është platforma online. Deri dje janë regjistruar mbi 700 aplikime. Kemi realizuar takimet e para me 70% të aplikuesve.
Kemi diskutuar profilet e tyre. Jemi duke planifikuar hapësirat e përfshirjes për të bashkëpunuar dhe për të krijuar një administratë shtetërore hibride. Qëllimi jonë për të rritur ekspertizën e administratës publike është prioriteti ynë. Nuk hyjnë në lojë as partia, sa miqtë dhe as arkat e peshkut. Ka raste specifike të atyre që tashmë janë bërë pjesë e jona”, tha Muzhaqi.
