Shpërthimet e fruthit janë kthyer në një shqetësim serioz për autoritetet shëndetësore në Europë, dhe Shqipëria nuk bën përjashtim, edhe pse numri i rasteve mbetet më i ulët se në vendet e rajonit.
Sipas Institutit të Shëndetit Publik, nga janari deri në mars janë regjistruar 12 raste të fruthit te fëmijët nga 0 deri në 14 vjeç, ku pjesa më e madhe janë të mitur nën moshën katër vjeç. Shumica e rasteve janë shfaqur në Fier, ndërsa të prekur ka edhe në Tiranë, Lezhë dhe Vau të Dejës.
Nga të prekurit, 75% nuk janë vaksinuar plotësisht, duke përfshirë nëntë fëmijë të pavaksinuar dhe tre të tjerë që kanë marrë vetëm një dozë të vaksinës. Mjekët raportojnë se të gjithë fëmijët e prekur janë trajtuar në spital dhe aktualisht ndodhen në gjendje të mirë shëndetësore.
Për të parandaluar përhapjen e fruthit, autoritetet shëndetësore u bëjnë thirrje çerdheve, kopshteve dhe shkollave që të mos pranojnë fëmijë pa kartelë vaksinimi.
Prindërit këshillohen të jenë vigjilentë, pasi në fazat e para sëmundja mund të ngatërrohet me virozat e rrugëve të frymëmarrjes.
Fruthi përhapet përmes ajrit dhe ka një shkallë infektimi shumë të lartë, ku një person i prekur mund ta transmetojë sëmundjen tek të gjithë ata me të cilët ka kontakt.
Simptomat fillestare përfshijnë temperaturë të lartë, skuqje të syve dhe rrjedhje hundësh, ndërsa pas disa ditësh shfaqen njollat karakteristike të skuqura në lëkurë.
Fruthi mund të çojë në ndërlikime serioze, madje edhe në humbje jete, ndaj vaksinimi mbetet masa më e sigurt mbrojtëse.
Sipas të dhënave zyrtare, rreth 92% e fëmijëve në Shqipëri kanë marrë dy dozat e vaksinës. Megjithatë, sipas Organizatës Botërore të Shëndetësisë, mbulesa e nevojshme vaksinale për të parandaluar shpërthimet e sëmundjes duhet të jetë të paktën 95%.
Me rritjen e lëvizjes së popullsisë, sidomos nga vendet e prekura në Europë, rreziku i infektimit mbetet i lartë, duke e bërë vaksinimin një domosdoshmëri për mbrojtjen e shëndetit publik.
