Në Francë ka hyrë në fuqi një ligj i ri që ndalon pirjen e duhanit në parqe publike, plazhe dhe disa zona të tjera publike, me synim mbrojtjen e fëmijëve nga ekspozimi ndaj tymit të cigares. Shkelësit do të përballen me gjoba që variojnë nga 135 deri në 700 euro.
Ligji përfshin gjithashtu ndalesa pranë ndalesave të autobusëve, si dhe në afërsi të menjëhershme të bibliotekave, pishinave dhe shkollave. Ai do të zbatohet një ditë pas publikimit në gazetën zyrtare të qeverisë, raportoi The Guardian.
Masa vjen vetëm një javë para fillimit të pushimeve verore për shkollat në Francë dhe synon të krijojë mjedise më të shëndetshme për fëmijët në hapësirat publike. Megjithatë, ndalimi nuk vlen për baret dhe restorantet, çka ka shkaktuar pakënaqësi te disa aktivistë anti-duhan.
Ligji përcakton gjithashtu se njerëzit nuk duhet të pinë duhan brenda një rrezeje prej 10 metrash nga shkollat, bibliotekat, pishinat dhe vende të tjera ku mund të dëmtohen të miturit. Ministria e Shëndetësisë do të publikojë së shpejti tabelat që do të vendosen për të shënuar këto zona të ndaluara.
“Tymi duhet të zhduket nga vendet ku janë fëmijët. Parqet, plazhet, shkollat janë vende për të luajtur, mësuar dhe marrë frymë. Ato nuk janë vende për të pirë duhan,” deklaroi Ministrja e Shëndetësisë Catherine Vautrin.
Nga ana tjetër, Yves Martinet, president i Komisionit Kombëtar Kundër Duhanpirjes dhe pulmonolog, e përshëndeti ligjin si një “hap në drejtimin e duhur”, por e konsideroi të pamjaftueshëm për shkak se nuk ndalon duhanin në lokalet e frekuentuara nga të rinjtë. “Ministri thekson mbrojtjen e fëmijëve, por fëmijët shkojnë edhe në kafene,” tha ai. Martinet shprehu gjithashtu shqetësim për faktin që ndalimi nuk përfshin cigaret elektronike, të cilat sipas tij “përdoren për të bërë të varur të rinjtë”.
