Ditën e sotme në Davos të Zvicrës do të zhvillohet takim mes udhëheqësve botëror dhe liderave të Ballkanit Perëndimor, për të folur mbi punimet e Forumit Ekonomik.
Në këtë forum që do të zgjasë deri më 19 janar, do të marrin pjesë edhe kryeministri i Kosovës, Albin Kurti dhe presidenti i Serbisë, Aleksandër Vuçiq. Pjesë e takimit do të jetë edhedërguari i posaçëm i Bashkimit Evropian për dialog, Miroslav Lajçak, i cili pritet që të zhvillojë takime të ndara me kryeministrin e Kosovës dhe presidentin serb.
Agjenda e takimeve u konfirmua nga zëdhënësi i Bashkimit Evropian, Peter Sano, i cili sqaroi se nuk pritet të ketë takim trepalësh të përbashkët.
Ndryshe takimi vjetor i Forumit Ekonomik Botëror këtë vit ka temën ‘Rindërtimi i besimit” dhe mbahet nga 15–19 janar 2024. Ky takim vjetor do të mirëpresë mbi 100 qeveri, të gjitha organizatat kryesore ndërkombëtare, 1000 partnerë të Forumit, si dhe drejtues të shoqërisë civile, ekspertë, përfaqësues të rinjsh, sipërmarrës socialë dhe media.
