Ky vit arsimor që nis zyrtarisht nesër për mijëra nxënës në të gjithë vendin, do të jetë një tjetër moment “eksperimental” paniku dhe anomalie për fëmijët.
Kjo për shkak të paaftësisë së Ministrisë së Arsimit, e cila nuk ka mundur që të menaxhojë si duhet deri tani organizimin e vitit mësimor.
Por ajo që është edhe më absurde dhe “çudia” më e fundit, është fakti që ministria u ka lënë përgjegjësinë nxënësve që të raportojnë të parët sapo të hasin me një rast të infektuar nga pandemia.
Madje sipas dritshkurtësisë së Ministrisë së Arsimit, do të jenë vetë fëmijët që do të mbajnë edhe përgjegjësi ligjore.
Në shkolla ka nisur të shpërndahet një dokument, të cilin çdo nxënës, duke nisur nga klasa e parë deri në vitin e fundit të gjimnazit, do të duhet që ta plotësojë çdo ditë para mësimit (duke humbur një orë) dhe të mbajë përgjegjësi.
Formulari tekst:
“Unë nxënësi/ja…klasa…deklaroj në përgjegjësinë time personale se kam/nuk kam pjesëtar të familjes time të prekur nga COVID-19. Unë personalisht nuk jam i prekur nga pandemia. Unë….prindi i nxënësit/es…. klasa…. deklaroj në përgjegjësinë time personale se fëmija im dhe familja ime nuk jemi të prekur nga covid-19. Nëse keni ndonjë pjesëtar të prekur, ju lutem specifikoni cilin…”,-shkruhet në dokument.
Pra një i mitur, ndoshta dhe në klasë të parë, do të mbajë përgjegjësi nëse ka pasur kontakte me të infektuar nga pandemia.
Po si mund t’i jepet një përgjegjësi e tillë një fëmije që ndoshta ende nuk e kuptuar mirë, se çfarë do të thotë pandemi, koronavirus, infektim, e terma të tjerë të ngjashëm?
Po emrin dhe firmën si do t’i shkruajë kur ende nuk i ka mësuar?
Për më tepër që një i mitur nuk mund të mbajë përgjegjësi ligjore/penale, deri në moshën 14 vjeç, ndërsa më herët për përgjegjës ligjor për të është prindi apo kujdestari.
Po ashtu në rrjet po qarkullon edhe formulari i kërkuar nga një shkollë private. Në të, ndryshe nga ai i shtetit, kërkohet deklarimi i prindit të fëmijës.
Si ka mundësi që një grup pedagogjik të ketë mendim më të “kthjellët” se një task-forcë e tërë e ngritur nga Ministria e Arsimit?
Duket se 18 vjeç, është shumë vonë që fëmija të bëhet i pavarur dhe i aftë për të marrë vendimet e tij.
Ka ardhur koha që sapo të mbarojnë para-shkollorin, fëmijët të “çajnë” vetë në jetë, duke mbajtur përgjegjësi madje edhe ligjore për çdo veprim.
Po jetojmë në kohëra të çuditshme…
/GazetaReforma.com/
