Mesa duket ka shpresa se mund të hapen negociatat për Shqipërinë dhe kjo vjen nga vet Komisioneri për zgjerimin, Johanes Hahn.
Hahn ka folur sot para Komitetit të Punëve të Jashte të Parlamentit Evropian dhe ka thënë se Komisioni Evropian do të japë rekomandim pozitiv për Shqipërinë dhe Maqedoninë e Veriut në momentin që do të paraqesë raportet.
Gjatë fjalës së tij, Hahn ka thënë se hapja e negociatave me ato shtete që përmbushin kushtet, ka lidhje të drejtpërdrejta besimi që Bashkimi Evropian ka në këto vende.
“Nëse partnerët tanë i kanë plotësuar kushtet, është detyra jonë për të përmbushur angazhimin tonë dhe për t’i hapur negociatat. Hapja e negociatave kërkon votën uanime të të gjithë anëtarëve.”, ka thënë komisionari.
Hahn gjithashtu ka thënë se BE-ja ka partnerë shumë të mirë në Ballkanin Perëndimor edhe pse rajoni është duke hapsur probleme. Këtu fjala hidhet tek protestat që po ndodhin në Serbi, Mal të Zi dhe Shqipëri, por edhe në ngërçin e krijuar në dialogun mes Prishtinës dhe Beogradit.
“Unë nuk do të përdorja termin “Pranvera e Ballkanit, pasi protestat në Serbi, Mal të Zi dhe Shqipëri bëhen për arsye dhe motive të ndryshme. Ka shumë çështje të politikës së brendshme që lidhen me këto protesta dhe vijnë si rrjedhim i pakënaqësisë kundrejt qeverive aktuale. Unë dua të shoh shumë pozitivisht hapjen e negociatave të anëtarësimit me Maqedoninë e Veriut, por rrjedhimisht edhe me Shqipërinë. Secili bëhet nervoz për këtë, por kjo nuk do të thotë gjë tjetër, përveçse që ne do të mund të fillojmë përgatitjet për hapjen e kapitujve të parë të negociatave. Dhe për këtë kërkohet vendim unanim i të gjitha shteteve anëtare. Pra, vlerësimi i përmbushjes së kritereve kërkon një vendim unanim. Por mesazhi ynë duhet tê jetë nga ana tjetër, se nëse partnerët tanë përmbushin kriteret për hapjen e negociatave, edhe ne duhet të reagojmë pozitivisht”, ka thënë Johannes Hahn.
