Kryeministri Edi Rama në një postim në rrjetet sociale, ka bërë me dije se 15 pacientë të tjerë kanë fituar betejën me COVID-19.
Bilanci tashmë është 67 të shëruar dhe 15 viktima nga 243 të prekur në total.
Në spitalin Infektiv janë shtruar 77 persona, në mesin e të cilëve 8 janë në terapi intensive, ku 3 prej tyre janë intubuar.
Në përditësismin e djeshëm, u shënuan 20 raste të reja nga 145 testime të kryera, ku Durrësi njohu një rritje të ndjeshme me 12 të prekur, duke shkuar në 26.
Në qytetin bregdetar, 11 të prekur janë nga e njëjta familje, pasi u infektuan nga një i moshuar.
Gjithashtu gjatë 24 orëve të fundit ndërruan jetë edhe dy persona, duke rritur bilancin e viktimave.
Epiqendra e koronavirusit ndërkohë vijon të jetë Tirana me 129 të prekur.
Autoritetet ndërkohë vijojnë me thirrjet për respektimin e higjienës, distancimit social dhe kufizimit të daljeve nga shtëpia.
