Procesi i numërimit të votave në Kosovë është thuajse drejt përfundimit dhe tashmë është përcaktuar edhe fituesi i zgjedhjeve. Lëvizja Vetëvendosje ka marrë gati 48% të votave që është edhe rezultati më i thellë që ka shënuar ndonjë forcë politike në Kosovë.
Ndërkohë, partitë e tjera paraqiten në pozita shumë të dobëta me në krye LDK që ka pësuar një humbje të thellë duke marrë vetëm 13% të votave.
LDK është renditur e treta me 13.41% të votave, ndërsa AAK e Ramush Haradinajt ka marrë 7.60% të votave nga 11.5% që shënoi në zgjedhjet e fundit. Ndërkohë, Nisma aktualisht ka 2.69% të votave, pamjaftueshëm për ta kaluar pragun.
Është hera e dytë që Albin Kurti do të ndërtojë një qeveri në këto dy vite, këtë herë në koalicion me ish-kandidaten e LDK-së për kryeministre, Vjosa Osmanin. LVV doli e para edhe në zgjedhjet e 2019-ës, ndërsa LDK-ja doli forcë e dytë. Dy partitë formuan koalicionin mes tyre që nuk zgjati më shumë se 50 ditë.
Ndërkohë, gjatë ditës së sotme pritet të nisin negociatat lidhur me koalicionet e mundshme që do të krijohen, dhe pritet të mbahet edhe fjalimi i fitores nga Albin Kurti. Kujtojmë që më herët kreu i AAK, Ramush Haradinaj u shpreh se partia e tij nuk ka asnjë vijë të kuqe dhe mund të hyj në koalicion me këdo, madje dhe me Vetëvendosjen.
