Spanja ka nisur përgatitjet për sfidën e radhës në fazën çerekfinale të Kampionatit Europian, ku do të përballet me Gjermaninë në atë që konsiderohet një “finale e parakohshme”. Pak ditë para kësaj sfide dhe pas fitores kundër Gjeorgjisë, Mikel Oyarzabal ka shprehur besimin dhe optimizmin e ekipit.
“Tri javë më parë askush nuk mendonte se ishim favorit për Kampionatin Europian, por tani të gjithë thonë se ne jemi në krye të listës,” tha Oyarzabal, lojtari i Real Sociedad. “Ne qëndruam të qetë si në fazën e grupeve, po ashtu edhe ndaj Gjeorgjisë, me shumë besim te vetja dhe duke ditur se mund të sfidojmë këdo. Ne nuk po pushojmë, kemi nisur përgatitjet dhe po mundohemi të përgatitemi në mënyrën më të mirë të mundshme për t’u përballur me Gjermaninë.”
Duke folur për kundërshtarin e ardhshëm, Oyarzabal vlerësoi Gjermaninë si një ekip të madh me lojtarë të shkëlqyer, por theksoi se Spanja nuk ka frikë. “Gjermania është një ekip i madh edhe me nivel individual të lartë, kanë lojtarë që bëjnë diferencën, të cilët kanë pasur një sezon të shkëlqyer, por ne kemi shumë besim. I respektojmë, por nuk i kemi frikë,” tha ai. “Kemi lojtarët më të mirë dhe jemi të gjithë të bashkuar, nuk ka ndarje brenda ekipit, të gjithë ndihemi të rëndësishëm.”
Ndeshja midis Spanjës dhe Gjermanisë do të zhvillohet më 5 korrik në Stuttgart, në orën 18:00. Tifozët dhe ekspertët e futbollit presin një përballje të ashpër dhe emocionuese, me të dyja skuadrat që kërkojnë të sigurojnë një vend në “finale”.
