Mijëra besimtarë bektashinj kremtuan sot festën e Abaz Aliut në malin e Tomorit. Në ceremoninë e organizuar me këtë rast ishte i pranishëm Kryegjyshi Botëror i Bektashinjve Haxhi Dede Edmond Brahimaj, drejtues vendorë, besimtarë bektashinj etj. Në fjalën e tij nga mali i Tomorit, Baba Mondi u shpreh se historia e lashtë e vendit tonë rrotullohet rreth Tomorit mitik.
“I lutemi që Zotit të na lehtësojë sakrificat tona, mundimet tonë në këtë jetë të përkohshme. Ne si shqiptarë duhet t’i kthehemi kombit, siç e kanë ruajtur të parët tanë ta ruajmë edhe ne, të mos të largohemi. Të përballojmë vështirësitë në vendin tonë. T’i kthehemi punës e diturisë se ajo e zhvillon njerëzimin”, u shpreh ai.
Ai gjithashtu u shpreh: “I lutemi Zotit gjithashtu që të gjithë njerëzit të jetojnë në paqe dhe dashuri. Për këtë lutemi edhe në këtë ditë këtu në malin e Tomorit”.
Mijëra pelegrinë udhëtuan sot Teqesë së Kulmakut për të kremtuar festën e Baba Tomorrit nën ritmet fetare të bektashinjve, pavarësisht besimeve fetare që i përkasin. Të gjithë besimtarët dhe pelegrinët që i bashkohen kësaj feste të shenjtë, në shenjë mirësie bëjnë kurban një qengj për veten dhe familjen.
Pak histori
Sipas gojëdhënave thuhet se Abaz Aliu, nga Arabia, së bashku me vëllanë e tij të vogël, u vendosën në Berat, duke u bërë mbrojtës të nahijes. I vëllai mbronte qytetin e Beratit, ndërsa Abaz Aliu u vendos në Tomor, për të mbrojtur gjithë fiset dhe krahinat e Tomorit. Ditën e 25 gushtit shpirti i tij vjen nga Olimpi dhe kthehet përsëri për të çliruar viset e Beratit nga gjithë të këqijat. Populli ka respekt e nderim hyjnor për dy vëllezërit, sepse betohet “për Baba Tomor”, “për Abaz Ali”.
